बझाङका १ लाख २२ हजार ३ सय ७६ मतदाताले अबको पाँच वर्षको लागि नेतृत्वको फैसला गर्दै

प्रतिनिधिसभा र प्रदेशसभा सदस्यका लागि अहिले बिहान ७ मतदान सुरु भएको छ । मतदाता आफ्नो मताधिकार प्रयोग गर्न व्यग्र प्रतिक्षामा छन् । आज बिहान ७ देखि साँझ ५ बजेसम्मको अवधिमा पतपेटिकामा खस्ने मतले आउँदो पाँच वर्षलाई देशको नेतृत्व कसलाई सुम्पने भन्ने फैसला गर्नेछ ।

मतदानपूर्वको सबै व्यवस्थापकीय तयारी पूरा भएको जिल्ला निर्वाचन कार्यालय बझाङले जनाएको छ । आज बझाङ जिल्लाभर १ सय ३५ वटा मतदान स्थल र १ सय ८६ वटा मतदान केन्द्रबाट १ लाख २२ हजार ३ सय ७६ मतदाताले अबको पाँच वर्षको लागि नेतृत्वको फैसला गर्दैछन् ।

सर्वदलीय बैठकदेखि मतदानकेन्द्र केन्द्रित तयारीका सबै काम पूरा भएको जिल्ला निर्वाचन अधिकारी विमल प्रसाद गौतमले बताउनुभयो । मतदानका लागि जिल्ला बाहिर रहेका मतदाता पनि मन परेको उम्मेदवारलाई मत दिन गाउँ फर्किएका छन् ।