प्रदेश सभा उपनिर्वाचनः राप्रपाबाट किशोर खड्का उम्मेदवार बने 

रिदम सिंह, बझाङ । राष्ट्रिय प्रजातन्त्र पार्टीले पनि उपनिर्वाचनका लागि उम्मेदवारको टुंगो लगाएको छ । आज (बिहीबार) राष्ट्रिय प्रजातन्त्र पार्टीले आगामी बैशाख १५ मा हुने उपनिर्वाचनका लागी युवा व्यावसायी किशोर खड्कालाई उम्मेदवारको रुपमा अघाडी सारेको हो । जिल्ला सदरमुकाम चैनपुरमा पत्रकार सम्मेलन गरी खड्का राप्रपाको उम्मेदवार भएको राप्रपा बझाङका अध्यक्ष वीरेन्द्रबहादुर मल्लले जानकारी दिनुभयो । 
उम्मेदवार सार्वजनिक कार्यक्रममा बोल्दै उम्मेदवार खड्काले अर्थतन्त्रको ठुलो हिस्सा ओगटेको पर्यटन क्षेत्रको प्रवद्र्धन नै आफ्नो मुख्य प्राथमिकतामा पर्ने बताउनुभएको छ । बझाङ पर्यटकिय क्षेत्रका हिसावले निकै अघाडी रहेको र सम्भावना बोकेका क्षेत्र थुप्रै भएकाले ती क्षेत्रहरुको प्रसार प्रचार तथा विकासका लागी आफुले काम गर्ने उहाँले बताउनुभयो । 
बझाङको वेरोजगारी, अशिक्षा, गरिवी र स्वास्थ्य समस्या समाधानका लागि आफुसँग भिजन भएका कारण बझाङ्गी जनताले आफुलाई सहयोग गर्ने समेत खड्काले अपेक्षा प्रकट गर्नुभएको छ । खड्का लामो समयदेखी बझाङको पर्यटन पर्वद्धनका लागि लाग्नुभएको थियो भने, बझाङ जिल्लामा लामो समय पत्रकारिता क्षेत्रमा पनि काम गर्नुभएको थियो ।