नेपाली कांग्रेस बझाङको तर्फबाट प्रदेशसभाका सामानुपातिक उम्मेदवार विसीको उम्मेदवारी रद्ध

बझाङ: निर्वाचन आयोगले बुधबार समानुपातिक तर्फका उम्मेदवारको अन्तिम नामावली सार्वजनिक गरेको छ । आयोगले सार्वजनिक गरेको नामावली अनुसार नेपाली कांग्रेस बझाङको तर्फबाट प्रदेशसभाका सामानुपातिक तर्फका उम्मेदवार साधना विसीको उम्मेदवारी रद्ध भएको छ । उमेर हदका कारण विसीको उम्मेदवारी रद्ध भएको आयोगले जनाएको छ । प्रदेशसभा सदस्य समानुपातिक निर्वाचन निर्देशिका, २०७९ को दफा १४ मा उम्मेदवार हुन आवश्यक योग्यताको व्यवस्था गरेको छ । दफा १४ बमोजिम प्रदेश सभा सदस्य समानुपातिक उम्मेदवार हुन २५ बर्ष उमेर पुगेको हुनुपर्ने व्यवस्था छ । 

तर साधनाको उमेर २४ बर्ष मात्र भएको र उमेर नपुेका कारण कारण कायम गरिएको उम्मेदवारी बन्दसूची बाट हटाईएको हो । आयोगले प्रतिनिधि र प्रदेश सभाका ५ सय ५० जनाको नाम बन्दसूचीबाट हटाएको थियो । समानुपातिकतर्फ दलले पेश गरेको बन्दसूचीमा नाम समावेश भएकामध्ये दाबी विरोधको जाँचबुझ, जरिवाना नतिरेका, लाभको पदमा रहेका र कालोसूचीमा रहेका पाँच सय ५० जनाको नाम सूचीबाट हटाइएको आयोगले जनाएको छ ।