सामाजिक सञ्जालमा उम्मेदवारी घोषणा नगर्न नेपाली कांग्रेस बझाङको आग्रह

बझाङ : नेपाली काँग्रेस बझाङले आफ्ना नेता तथा कार्यकर्तालाई चुनाव लक्षित क्रियाकलाप पार्टीको सल्लाह विपरित नगर्न सचेत गराएको छ । शनिबार खप्तडछान्ना गाउँपालिकामा बसेको नेपाली काँग्रेस जिल्ला कार्यसमितिको दोस्रो बैठकले आफ्ना पार्टीका नेता तथा कार्यकर्तालाई सचेत गराएको हो । 

दोस्रो बैठक मार्फत काँग्रेसले  यहि बैशाख ३० गते तोकिएको स्थानीय तह निर्वाचनमा स्वेच्छिक तरिकाले उम्मेद्वारी घोषणा नगर्न नेता कार्यकर्ताहरुलाई आग्रह गरेको छ । 

यस्तै पार्टीले आधिकारिक उम्मेदवार तय नगर्दासम्म सामाजिक सञ्जाल, पत्रिका र अन्य माध्यमहरूमा उम्मेदवारी घोषणा नगर्न दोस्रो बैठक मार्फत सन्देश दिएको हो । दोस्रो बैठकमा बोल्दै नेपाली काँग्रेसका नेता तथा कार्यकर्ताहरुले नेता तथा कार्यकर्ताहरुलाई निर्वाचनको परिणाम काँग्रेसको पक्षमा ल्याउन आ–आफ्नो क्षेत्रमा सक्रिय भएर लाग्न अनुरोध गरेका छन् । 

यदि कसैले पार्टीको निति,नियम, मर्म, भावना विपरित स्वेच्छिक ढंगबाट उम्मेदारी घोषणा गरेमा पार्टीले काबार्ही गर्ने नेपाली काँग्रेस बझाङ क्षेत्र नम्बर १ (क) क्षेत्रीय सभापती पुस्कल बोहराले बताउनुभयो ।