संकटग्रस्त पालिका घोषणा गरेपनि पिडितहरुको खाद्य अधिकारका सवालमा सरकार मौन

बझाङ: फियान नेपालको आयोजनामा जिल्ला खाद्य अधिकार संजालको बैठक सदरमुकाम सम्पन्न भएको छ । संजालका अध्यक्ष जगदिश रोकायाको अध्यक्षतामा बसेको बैठकमा जिल्लामा भएका खाद्य अधिकारका सवालमा सरोकारवालाहरु संग छलफल गरेको छ । बैठकले जिल्लामा भएका खाद्य अधिकारका सवाल पहिचान गर्ने, महिलाका खाद्य अधिकारको सवालको अवस्था र वकालत पैरवी कार्ययोजना लगायतका विषयमा छलफल गरेको थियो । फियान नेपालले जिल्लामा खाद्य सुरक्षा र अधिकारका विषयमा वकालत तथा पैरवी गर्दै आएको छ ।

जिल्लाका ग्रामिण भेगमा बाँदर आतंक, सेती तथा कालंगा नदीको कटानका कारण खेती योग् जमिन नष्ट र रैथाने बाली संरक्षणको अभावमा खाद्य अधिकार हनन भएको ठहर गरेको छ । जिल्लाका केहि ठाँउमा अझैपनि लालपुर्जा विहिन परिवार रहेको र विपदका कारण धेरै जसो परिवार भुमीहिन भएको प्रगतिशिल युवा समाजका अध्यक्ष रमेश केसीले बताउनु भयो । परम्परागत मान्यता र कुपर्थाका कारण पोषणयुक्त खाना खान नपाउनु, मदिरा सेवनका कारण पुरुषहरुले पैसा सक्ने र दक्ष सिपको अभावले महिलाको खाद्य अधिकार हनन भएको दलित सहयोग समाजका टिम लिडर सुनील नेपालीले बताउनु भयो ।

गत बर्षको कात्र्तिक महिनामा आएको बाढीले जिल्लाका विभिन्न ठाँउमा ठुलो भौतिक क्षति गरेको र सरकारले संकटग्रस्त पालिका घोषणा गरेपनि पिडितहरुको खाद्य अधिकारका सवालमा सरकार मौन रहेको फियान नेपाल बझाङका जिल्ला संयोजक सीता सिंहले बताउनु भयो । संकटग्रस्त पालिका घोषणाभएको क्षेत्रमा सरकारले निशुल्क वा सहुलियत मुल्यमा खाद्यान्नको व्यवस्थापन गर्नुपर्ने भएपनि सरकारले कुनै वास्ता नगरेको सिंहको भनाई छ ।