बझाङको खप्तडछान्नामा पारिवारिक प्रतिसोधका कारण तिहारकै दिन झडप, चार जना गम्भीर घाइते

खप्तडछान्ना गाउँपालिका ६ पाटादेवलमा भएको बिहीबार साँझ दोहोरो झडपमा चार जना गम्भीर घाइते भएका छन् । गम्भीर घाइते चार जनाकै बझाङमा उपचार सम्भव नभएपछि बिहीबार राति नै धनगढी रेफर गरिएको छ।

घाइतेहरुमा बसन्त खड्का, त्रिभूवन खड्का, प्रकाश खड्का र दिपक खड्का रहेका छन् । उनीहरुबीच पुरानै पारिवारिक प्रतिसोधका कारण झडप भएको वडाध्यक्ष तेजबहादुर खड्काले बताए । तर निवर्तमान वडाध्यक्ष तिलक खड्काले भने यस घटनामा वर्तमान वडाध्यक्ष तेज खड्का नै सामेल रहेको र सुनियोजित ढंगले काम गरेर घर फर्किरहेका बसन्त खड्का र दिपक खड्कामाथि अनावश्यक लफडा झिकेको दाबी गरे । 

उनका अनुसार बसन्त खड्काले चुनावी प्रचारको विवादका क्रममा त्रिभुवन खड्काको टाउकोमा बोतलले हिर्काउँदा झगडा सुरु भएको हो । घाइते हुनेहरु नेकपा एमाले र नेपाली कांग्रेसका समर्थक रहेको बुझिएको छ । पाटादेवलमा खड्का परिवारबीच राजनितिक प्रतिसोधकै कारण प्राय: जसो झडप भइरहन्छ ।  उनीहरु सबै एकै परिवारका रहेका छन् ।