चैनपुरमा शृङ्खलावद्ध चोरीका घटना बढ्दै, गयराति प्रहरीलाई चुनौती दिदै मुख्य बजारमा चोरी

बझाङ सदरमुकाम चैनपुरमा एक पसलमा चोरी भएको छ । गयराती सदरमुकाम चैनपुरस्थित ओली तरकारी पसल नजिकै रहेको एस प्लस मोबाइल ग्यालरी पसलमा चोरी भएको हो ।

पसलबाट एक ल्यापटप, १९ वटा स्मार्ट मोबाइल फोन र १३ वटा किवर्ड मोबाइल फोन र ८ हजार बराबर नगद र अन्य सामान गरि ४ लाख बढीका सामान चोरी भएको मोबाइल ग्यालरीका सञ्चालक शिबराज उपाध्यायले बताउनुभएको छ । उहाँका अनुसार पसलसँगै रहेको रामप्रसाद उपाध्यायको चिया पसलबाट प्लाइउड तोडेर चोरी गरिएको भेटिएको हो ।

चोरी भएको स्थान सदरमुकाम चैनपुरको मध्यस्थान र प्रहरीले सुरक्षास्थान भए पनि प्रहरीलाई नै चुनौती थपिएको छ । यसअघि पनि सदरमुकाम चैनपुरमा शृङ्खलावद्ध चोरी हुँदै आएका छन् ।

चैनपुरका व्यवसायीले असुरक्षित रहेको भन्दै प्रहरी प्रशासन र नगरपालिकालाई गुहारे पनि अहिलेसम्म सुरक्षा चुनौती भने हटेको छैन । केहि समय अगाडी जयपृथ्वी नगरपालिकाका मेयर चेतराज बजालले चैनपुर बजारको सुरक्षा र फोहोर व्यवस्थापनका लागि २० दिनभित्र सिसिटिभी क्यामेरा जडान गर्ने एक कार्यक्रममा उद्घोष गरे पनि उहाँ चुक्नुभएको छ ।