प्रेस पास नवीकरण अनलाइनबाटै, पत्रकार प्रशिक्षणको पनि व्यवस्था गरिने

सरकारले आगामी आर्थिक वर्षदेखि प्रेस पास अनलाइनबाटै नवीकरण गर्ने भएको छ ।

सञ्चार तथा सूचना प्रविधि मन्त्रालयका सचिव हरिप्रसाद बस्यालले आगामी आर्थिक वर्षबाट अनलाइन नवीकरणको व्यवस्था गर्ने गरी तयारी अघि बढाइएको जानकारी दिए ।

'अहिले प्रेस पास नवीकरण तथा नयाँ लिन निकै कठिन रहेछ । नवीकरण गर्न जाजरकोटबाट पनि सञ्चारग्राम आउनु पर्ने' अर्थ समितिले राखेको पूर्वबजेट छलफल कार्यक्रममा सचिव बस्यालले भने, 'आगामी आर्थिक वर्षबाट भने अनलाइनबाट नवीकरण गर्ने गरी काम अघि बढाएका छौँ ।'

उनले आगामी आर्थिक वर्षबाट पत्रकार प्रशिक्षणको पनि व्यवस्था गरिने बताए । 'कति ज्ञान भएपछि पत्रकार हुन पाइने हो, सामान्य कस्तो कुरा जान्नु पर्ने हो यी विषयसहित पत्रकार प्रशिक्षणको व्यवस्था पनि गरिनेछ,' बस्यालले भने ।

मन्त्रालयले आगामी आर्थिक वर्षका लागि ३१ करोड ३९ लाख बजेट सिलिङ तोकेको छ । जसमध्ये २७ करोड ९७ लाख रुपैयाँ पुँजीगत र तीन करोड ४१ लाख रुपैयाँ चालु खर्च प्रस्ताव गरिएको छ ।