मष्टा गाउँपालिकाले एक आर्थिक वर्षमा ३२ वटा मन्दिर निर्माण तथा मर्मत गरि करिब ९ लाख खर्चेको पाइयो

मष्टा गाउँपालिकाले एक आर्थिक वर्षमा ३२ वटा मन्दिर निर्माण तथा मर्मत गरेको छ । आर्थिक वर्ष २०७७/७८ मा मष्टा गाउँपालिकाले ८ लाख ९० हजार विनियोजन ३२ वटा मन्दिरमा खर्च गरेको महालेखा परिक्षकको कार्यालयको २०७९ को प्रतिवेदनले देखाएको छ ।

दिगो र उत्पादनमूलक क्षेत्रमा पुँजिगत बजेट बिनियोजन गरी स्थानीय रोजगारी सृजना तथा गरवी निवारणमा केन्द्रित हुनुपर्नेमा पालिकाले अनुत्पादक क्षेत्र मन्दिर निर्माण जस्ता धार्मिक क्रियाकलापमा कूल पालिकाको पुँजीगत बजेटको ०.५ प्रतिशत खर्च भएको देखिएको छ ।

स्थानीय सरकार सञ्चालन ऐन २०७४ ले प्रमुख प्रशासकिय अधिकृतले स्वीकृत बजेट खर्च गर्दा नियमितता मितव्यिता प्रभावकारिता कार्य दक्षता र औचित्यता समेतको आधारमा खर्च गर्नुपर्ने व्यवस्था छ तर मष्टा गाउँपालिकाले यी कुराहरु ध्यान नदिएर अनुत्पादक क्षेत्रमा कार्यकर्तामुखी र वितरणमुखी बजेट विनियोजन गरि राज्यकोषको दोहन गरेको छ ।