चैनपुर-सुर्मा सडक अवरुद्ध भएको ९ दिन बित्यो, बुधबारबाट सडक खुलाउन पहल गर्ने गाउँपालिका अध्यक्ष बोहराको भनाई

सदरमुकाम चैनपुर-सुर्मा गाउँपालिका जोड्ने सडक ९ दिनदेखि अवरुद्ध छ । सडक सुर्मा गाउँपालिकाको सुँगुरीपाल्त भन्ने स्थानमा अवरुद्ध भएको हो ।

सुर्मा गाउँपालिकाको आफ्नै जेसिबी भए पनि थन्काइएको छ । सडक अवरुद्ध हुँदा सुर्मावासीले सदरमुकाम चैनपुरमा एक दिन पुरै पैदल हिड्नु परेको स्थानीय तथा होटेल व्यवसायी चक्र बोहराले बताए । उनका अनुसार गाउँपालिका अध्यक्ष खडक बोहरा र जिल्ला समन्वय समिति प्रमुख नरबहादुर गाउँपालिकाको बैठकमा जाँदा र सदरमुकाम चैनपुर आउँदा पैदल हिड्न बाध्य भएका थिए ।

सडक अवरुद्ध हुँदा जनतालाई शास्ती भएको थाहा भए पनि पालिकाले आफ्नै जेसिबी हुँदा पनि सडक खुलाउन नसकेको बोहराको गुनासो छ । यसबारे गाउँपालिका अध्यक्ष खडक बोहराले स्थानीयको अवरोधका कारण सडक खुलाउन नसकिएको बताएका छन् ।

उनका अनुसार सडकको माटो तथा ढुंगा स्थानीयको जमिन पर्ने हुँदा पन्छाउन नदिएको र मंगलबार स्थानीय र गाउँपालिकाबीच सहमति भएको हुँदा बुधबारबाट सडक सूचारु हुनेछ । नजिकिरहेको सुर्मादेवी तथा बिरिजात मेलाका कारण पनि स्थानीयहरु सडक खुलाउन सहमत भएको अध्यक्ष बाेहराले बताए ।