४० औं विपि स्मृति दिवस : नेविसंघले जिल्ला अस्पतालका विरामीलाई फलफूल वितरण गर्‍यो, जयपृथ्वी नगर कार्यसमितिले वृक्षारोपण गर्‍यो 

नेपालका प्रथम जननिर्वाचित प्रधानमन्त्री विश्वेश्वरप्रसाद कोइरालाको स्मरणमा बझाङमा पनि आज विभिन्न कार्यक्रम आयोजना भएका छन् ।

नेपालमा प्रजातन्त्रको स्थापनाका लागि आजीवन सङ्घर्ष गरेका दूरदर्शी नेता कोइरालाको वि.स. २०३९ साल साउन ६ गते निधन भएको थियो । प्रत्येक वर्षको साउन ६ गतेलाई विपी स्मृति दिवसका रूपमा विभिन्न कार्यक्रम गरेर मनाउने प्रचलन छ । त्यही दिनको सम्झनामा आज बझाङमा नेपाली कांग्रेस र नेपाली कांग्रेस भातृ संगठनहरुले ४० औं स्मृति दिवस मनाएका छन् ।

नेपाल विद्यार्थी संघ जिल्ला कार्यसमिति बझाङले अध्यक्ष दिपक भण्डारीको संयोजकत्व र जयपृथ्वी नगपालिकाका मेयर चेतराज बजालको प्रमुख आतिथ्यतामा आज जिल्ला अस्पताल सिमखेतमा भर्ना भइ उपचार गराइरहेका २५ जना विरामीलाई फलफूल तथा जुस वितरण गरेको छ ।

यस्तै नेपाली कांग्रेस जयपृथ्वी नगर कार्यसमितिले पनि नगरसभापति हिरेन्द्र छत्यालको संयोजकत्वमा र जयपृथ्वी नगरपालिकाका मेयर चेतराज बजालको प्रमुख आतिथ्यतामा वृक्षारोपण कार्यक्रम गरेको छ । वि.सं. २००५ सालमा बनारस, २००९ सालमा जनकपुर र २०१७ सालमा काठमाडौंमा भएका काँग्रेसको महाधिवेशनमा विपिले उक्त पार्टीको सभापतिको जिम्मेवारी प्राप्त गरेका थिए ।

२०१५ सालमा बहुदलीय व्यवस्थामा आधारित संसदको निर्वाचनमा विराटनगरबाट विजयी बनेका विपी २०१६ साल असार १६ गतेदेखि २०१७ साल पौष १ गतेसम्म नेपालको प्रथम जननिर्वाचित प्रधानमन्त्री बनेका थिए ।

राजनीतिका साथै साहित्यका क्षेत्रमा समेत महत्वपूणर् योगदान पुर्‍याएका कोइरालाका तीन घुम्ती (२०२५), नरेन्द्र दाइ (२०२६), सुम्निमा (२०२७), मोदीआइन (२०३६), हिटलर र यहुदी (२०४०), बाबु,आमा र छोरा (२०४५), उपन्यास एवम् कथातर्फ-मेरो कथा (२०४०), दोषी चश्मा (२०३९) र श्वेत भैरवी (२०३९) प्रकाशित छन् ।

एनका साहित्यिक कृतिहरू विशेषतः यौन मनोविज्ञानमा आधारित छन् । विपी कोइरालाको तस्विर अङ्कित पहिलो हुलाक टिकट २०४७ सालमा प्रकाशन भएको थियो ।