१८ परिवार सदस्य गुमाएका थलारा ४ डिख्लाका पहिरो पिडित कलक शार्की ४ वर्षीया छोरीसँग संघर्षको जीवन बिताउँदै

गत कार्तिक पहिलो साता आएको पहिरोसँगै थलारा ४ डिख्लाका कलक शार्कीका जीवनसंगीनीसहित १८ जना परिवार सदस्य सदाका लागि उनलाई छोडेर विदा भए । त्यसयताका दिनहरुमा कलक शार्की र उनका ४ वर्षीया छोरी मात्रै संघर्षको जीवन बिताइरहेका छन् । अझैं पनि पानी पर्नासाथ कलक झस्किने गरेका छन् ।

अहिले कलकको बगेको घरभन्दा माथि गाउँमा एक खरले छाएको छानो बसोबास छ । विभिन्न संघसंस्था र व्यक्तिबाट राहत स्वरुप उठेको रकमले अहिले दुई बुबाछोरी छाक टारिरहेका छन् ।

उनलाई पहिले प्रधानमन्त्री शेरबहादुर देउवा, गृहमन्त्री बालकृष्ण लगायत हेलिकप्टरबाट बझाङका बाढी पहिरो पिडितको समस्या बुझ्न आए र आफ्नाे समस्या समाधान हुन्छ लागेको थियो । हेलिकप्टर निरिक्षणपछि सरकार एकाएक हराएको र नजिकै रहेको स्थानीय सरकार पनि मौन रहेको देख्दा उनलाई सरकारप्रति वितृष्णा जाग्यो । 

अर्का पाँच परिवार गुमाएका नरे पार्की गाउँ नै छोडेर भारतमा बसाईँ सरि सकेका छन् । सरकारले बाढी पहिरो संकटग्रस्त क्षेत्र घोषणा गरे पनि त्यो कार्यक्रम लागु नभइ सकिदा बझाङबासीले त्यसको फाइदा लिन सकेनन् भने बगेका र भत्केका संरचना पनि पुननिर्माण हुन सकेनन् । 

आफूहरुलाई दुख परेको बेला पनि सरकार रमिते बन्दा बझाङका बाढी पहिरो पिडितहरु तीनै तहका सरकारप्रति विश्वस्त नभएको खप्तडछान्ना ७ डाँडाबाडाका रमेश आग्री बताउनुहुन्छ । अहिले पनि खप्तडछान्नाका विभिन्न ठाउँमा बाढी पहिरोको त्रास भए पनि आफ्ना समस्या कोसँग राख्ने भन्नेमा आफूहरु अलमलमा परेको उहाँको भनाई छ ।

खप्तडछान्नाका धेरै जोखिम स्थानमा रहेका बस्ति सुरक्षित ठाउँमा सारिने निवर्तमान गाउँपालिका अध्यक्ष बर्क रोकायाले प्रतिवद्धता जनाउनुभएको थियो तर पनि उहाँले विस्तारै आफ्ना प्रतिवद्धता बिर्सेर बाहिरिनुभएको खप्तडछान्ना ३ का सुर्जन रावलले बताउनुभयो ।