जाखखेत सिमोल्तोला पुगर सडक ठाउँठाउँमा पहिरो खस्दा एक हप्तादेखि अवरुद्ध, कुर्मली खोलामा जोखीम मोलेर जंघार तर्दै स्थानीय

बझाङ : जयपृथ्वी नगरपालिकाको ३ र ४ पुगर क्षेत्र जोड्ने जाखखेत सिमोल्तोला पुगर सडक ठाउँठाउँमा पहिरो खस्दा एक हप्तादेखि अवरुद्ध बनेको छ ।

सडक अवरुद्ध हुँदा पुगरमा स्थायी बसोबास गरिरहेका बासिन्दा र पडेश, गोलाई र सिमोल्तोलाका लेकबेसी गर्नेहरुलाई निकै असहज भएको छ । सडक खण्डको फुटापड, बाटेगडा, सिमोल्तोला र कुर्मुली खोलामा सडक माथिबाट पहिरो खसेको छ । 

यसका साथै कुर्मली खोलामा निर्माणाधिन झोलुङ्गे समयमै नबन्दा त्यस तर्फका बासिन्दालाई झन् असहज भएको जयपृथ्वी नगरपालिका ३ सिमोल्तोलाका किशोर विष्टले बताउनुभयो । 

उहाँका अनुसार पानी परेको दिन कुर्मुली खोलामा जंघार तर्न निकै असहज हुने गरेको छ । ससाना स्कुले बालबालिका, दुखी, विरामी र महिलाहरुलाई खोला तर्न निकै सास्ती हुने गरेको अर्का स्थानीय मानबहादुर ओलीले बताउनुभयो । तर यता जयपृथ्वी नगरपालिका ३ का वडाध्यक्ष गंगबहादुर खड्काले भने एकहप्ताभित्रै निर्माणाधिन झोलुंगे पुल बनिसक्ने दाबी गर्नुभएको छ ।

उहाँका अनुसार झोलुंगे पुलका लठ्ठा बनाउने काम सकिएको र छिट्टै पुलमा हिड्ने वातावरण सिर्जना हुनेछ । साथै सडक पनि चाँडै सफा गरिने पनि वडाध्यक्ष खड्काको दाबी छ ।