पानी पर्न थालेपछि बझाङ किसानलाई राहत महशुश, बझाङमा २० प्रतिशतमा मात्रै रोपाइँ सकियो

बझाङ : समयमै वर्षा नहुँदा रोपाइँ गर्न समस्या भएका बझाङ किसानलाई पानी पर्न थालेपछि राहत महशुश भएको छ । आकाशे पानीको भरमा धान रोप्दै आएका यहाँका किसान कहिले पानी पर्ला भनेर आकाश हेरेर बसेका छन् । यहाँ अधिकांश क्षेत्रमा आकाशे पानीको भरमा रोपाइँ गर्ने गरिएको  छ । बझाङमा गयरातिदेखि मनसुन भित्रिएकाले अब यहाँका किसानलाई राहत महशुश भएको जयपृथ्वी नगरपालिका ३ कर्ण खड्काले बताउनुभयो ।

यो समय रोपाइँका लागि उत्तम समयको रहेको भए पनि वर्षा नहुँदा समस्या भएको किसानले बताएका छन् ।  ब्याड राखिएको बीउ रोप्न योग्य भए पनि पानीको अभावमा खेत बाँझै रहेको मष्टा गाउँपालिका–१ कोटदेवलका जलन खड्काले जानकारी दिनुभयो । रोप्नका लागि बनाइएको बेर्नासमेत पानीका मूल सुक्दै जाँदा बचाउन मुस्किल भएको छ ।   उनले भने, “हाम्रो खेतमा सिँचाइ सुविधा छैन । आकाशे पानी पर्खिरहेका छौँ । अहिलेसम्म धान रोप्न पाएका छैनौँ, बेर्ना सुक्दै गएका छन् ।” 

गत जेठ १५ गतेदेखि असार मसान्तसम्म रोपाइँका लागि उत्तम समय मानिन्छ । ८ हजार हेक्टर क्षेत्रफल धान खेती हुने बझाङमा ६ हजार हेक्टर क्षेत्रफलमा रोपाइ हुनेगरेको छ भने २ हजार हेक्टर क्षेत्रफलमा छरुवा धान खेती हुने गर्दछ । बझाङमा हालसम्म बढीमा २० प्रतिशतमा मात्रै रोपाइँ भएको अनुमान कृषि ज्ञान केन्द्रको छ ।  बेसीक्षेत्र तथा  सिँचाइ सुविधा भएका क्षेत्रमा मात्रै रोपाइँ भएको केन्द्र प्रमुख टेकबहादुर बिष्टले जानकारी दिनुभयो । रोपाइँका लागि यो उपयुक्त समय भए पनि प्रशस्त वर्षा नहुँदा यो  समयमा  रोपाइँ गर्न सकिएको छैन ।