विधुतगृह बगाएपछि बझाङका ग्रामीणबस्ती चार महिनादेखि अँध्यारोमा

बझाङ: बेमौसमी वर्षाका कारण आएको बाढीले विद्युत्गृह बगाउँदा बझाङका खप्तडछान्ना, थलारा र मष्टा गाउँपालिकाका ११ सयभन्दा बढी परिवार चार महिनादेखि अन्धकारमा बस्न बाध्य भएका छन् । कात्तिकको १ गते भएको वर्षापछि आएको बाढीले विद्युत्गृह नहर र विद्युत्का पोललगायतको संरचनामा क्षति पु¥याएको छ । खप्तडछान्ना गाँउपालिकाको जडारीगाड खोलामा आएको बाढीले २१ किलोवाट क्षमताको माथिल्लो जडारीगाड लघु जलविद्युत्मा पूर्ण रूपमा क्षति पु¥याएको छ ।

बाढीले विद्युत्गृह, नहर र पोल बगाएपछि ५ गाउँका ३ सय ७५ घरपरिवार अन्धकारमा बस्न बाध्य भएका छन् । बाढीले जडारीगाड खोलामै बनेको ५२ किलोवाट क्षमताको दोस्रो जडारीगाड लघु जलविद्युत् आयोजनाको नहर र विद्युत्गृहमा पनि क्षति पु¥याएको छ । जसका कारण थलारा गाउँपालिका– ९ का ४ सय ९६ परिवार चार महिनादेखि अन्धकारमा बस्दै आएका छन् । त्यस्तै मष्टा गाँउपालिकामा रहेको डुङग्रीगाड लघु जलविद्युत्‌ आयोजना बगाउदा २८० घरपरिवार पनि अन्धकारमा बस्दै आएका छन् ।

विद्युत्‌ नहुँदा विद्यार्थीहरूको पढाइमा असर परेको छ । विद्युत् सेवा अवरुद्ध हुँदा गाउँमा सञ्चालित उद्योग, व्यवसाय, विद्यालय, सहकारी, मिल र स्वास्थ्य संस्थाहरूको काम प्रभावित भएको छ । पुनर्निर्माणमा सहयोग गरिदिन गाउँपालिकासँग माग गरे पनि समस्या समाधानका लागि कतैबाट सहयोग नभएको स्थानीयको भनाइ छ ।

खप्तडछान्ना, मष्टा र थलाराका साथसाथै जिल्लाभरका ३० भन्दा बढी लघु जलविद्युत्‌  आयोजनामा बाढीका कारण आंशिकदेखि पूर्ण क्षति भएको छ । सामान्य क्षति भएको अवस्थामा गाउँपालिकाले मर्मत गर्ने सके पनि पूर्ण रूपमा क्षति भएकाले तत्कालै विद्युत्‌ सुचारु गर्न कठिन भएको खप्तडछान्ना गाउँपालिकाका सूचना अधिकारी ऐन रोकायाले बताउनु भयो ।