१६ वर्षदेखि फरार रहेका बझाङका एक कर्तव्य ज्यान मुद्धाका प्रतिवादी धनगढीबाट पक्राउ

बझाङ : कर्तव्य ज्यान मुद्धामा फरार रहेका बझाङका एक जना प्रतिवादी धनगढीबाट पक्राउ परेका छन् । बझाङको जयपृथ्वी नगरपालिका वडा नम्बर ७ (साविकको सुवेडा गाविस ८) ज्वाडाका २० वर्ष जेल सजाय सुनाइएका फरार प्रतिविादी प्रकाश राना धनगढी उपमहानगरपालिका वडा नम्बर ८ मोतीचोकबाट पक्राउ परेका हुन् ।

३९ वर्षीय रानाले २०६२ साल असोज २३ गते जयपृथ्वी नगरपालिका ७ ज्वाडाका मिनबहादुर भण्डारीलाई धारिलो हतियार प्रयोग गरि हत्या गरेको पुष्टि हुन आएकाले जिल्ला अदालत बझाङले २० जेल सजाय सुनाएको थियो ।

उनलाई जिल्ला प्रहरी कार्यालय बझाङले जिल्ला प्रहरी कार्यालय कैलालीसँग समन्वय गरि सोमबार पक्राउ गरेको र मंगलबार जिल्ला अदालत बझाङमा दाखिला गरेको बझाङका प्रहरी प्रमुख तथा डिएसपी ज्ञानबहादुर विष्टले बताउनुभयो ।