धकेलाधकेल हुँदा बझाङमा एक जनाको ज्यान गयो, धकेल्नेलाई पक्राउ गरि अनुसन्धान हुँदै

बझाङ : जयपृथ्वी नगरपालिका ७ ज्वाडाका एक जनाको हत्या भएको छ । गयराति ७ : ३० बजे जयपृथ्वी नगरपालिका ७ का ४६ वर्षीय पिरु भण्डारीको ज्वाडाकै २३ वर्षीय दिपेन्द्र थापासँग कुलीबाँध खोलामा विवाद उत्पन्न भइ धकेलाधकेल भएको र भण्डारी घाइते भएपछि अस्पताल ल्याइएको थियो ।

भण्डारीको अस्पतालमा उपचारका क्रममा मृत्यु भएको जिल्ला प्रहरी कार्यालय बझाङले जनाएको छ । भारत जान लागेका छोरालाई गाडीमा चढाएर फर्किएका मृतक पिरु भण्डारी र थापाको कुलीबाँध खोलामा हिडिरहेका बेला विवाद उत्पन्न भएको थियो । मदिरा सेवन गरेका उनीहरुले विवादपछि दुबैबीच धकेलाधकेला हुँदा भण्डारी घाइते भएका थिए ।

घटना संलग्न दिपेन्द्र थापालाई हिजो राति नै पक्राउ गरि प्रहरी हिरासतमा राखिएको छ । मृतकको शव जिल्ला अस्पताल बझाङमा राखिएको छ । घटनाबारे थप अनुसन्धान भइरहेको प्रहरीले जनाएको छ ।