सरकारलाई पेट्रोलियम पदार्थमा गरिएको मूल्य वृद्धि फिर्ता लिन अनेरास्ववियु बझाङको माग

बझाङ: नेकपा एमालेको निकट विध्यार्थी संगठन (अनेरास्ववियु) बझाङले पेट्रोलियम पदार्थमा गरिएको मूल्य वृद्धि फिर्ता लिन माग गरेको छ । अनेरास्ववियुका जिल्ला अध्यक्ष प्रविन्द्र धामी सहितको टोलीले प्रमुख जिल्ला अधिकारी मार्फत प्रधानमन्त्रीलाई ज्ञापन पत्र बुझाएका छन । ज्ञापन पत्रमा परमादेश सरकारले पेट्रोलियम पदार्थको मूल्य वृद्धि गरेर नागरिकलाई मारमा पारेको भन्दै मूल्यवृद्धि फिर्ता लिन माग गरेको हो । अनेरास्ववियुले  मूल्य वृद्धि खारेज नगरे कडा आन्दोलन गर्ने चेतावनी समेत दिएको छ ।

परमादेशबाट बनेकाे सरकारको निर्देशनमा पटक पटक नेपाल आयल निगमले पेट्रोलियम पदार्थको मुल्य बृद्धि गरी जनताको आधारभुत आवश्यकताको व्यवास्ता गर्दै देशमा महंगी बढाई जनताको ढाड सेक्ने काम गरेको अनेरास्ववियुको ठहर छ । मुल्य समायोजनको बाहानामा अन्र्तराष्ट्रिय बजारमा पेट्रोलियम पदार्थको मुल्य बढदा बढाउने तर मुल्य घटदा नघटाई निगमका कर्मचारीलाई बोनस र भत्ता दिने गरेकाेमा अनेरास्ववियुले आपत्ती जनाएको छ । निगम निरन्तर घाटामा देखाएर मुल्य बृद्धि गराएको निगमको कार्य प्रति खेद प्रकट गरेको छ । नेपाल आयल निगमले बुधबार पेट्रोलियम पदार्थ र ग्यासमा मूल्य वृद्धि गरेको थियो ।