झनाना पक्की पुलमा पनि क्षति पुगेको प्राविधिक टोलीको निष्कर्ष, ठूला सवारी नगुडाउन सुझाव

बझाङ : कात्तिक पहिलो साता आएको बेमौषमी बर्षाका कारण झनाना पक्की पुलमा पनि क्षति पुगेको पाइएको छ । झनाना पक्की पुलको झनाना तर्फको पिल्लरमा नदीको बहाबले क्षति पुगेको प्राविधिक अध्ययनबाट पाइएको हो ।

सडक सञ्चालन लागि बैकल्पीक मार्गका रुपमा हेरिएको उक्त पुलको पिल्लरमा क्षति भइ ठूला सवारी हाँक्न अयोग्य ठानिएको प्रमुख जिल्ला अधिकारी मोहन अधिकारीले बताउनुभयो ।

उहाँले जयपृथ्वी राजमार्गको बैकल्पिक मार्ग त्यस सडकलाई लिइएको तर प्राविधिक टोलीले त्यस पूलमा गाडी नचलाउन सुझाव दिएपछि त्यस तर्फ सडक मर्मतको काम रोकिएको बताउनुभयो ।

सडक डिभिजन कार्यालय बैतडीका इन्जिनियर बर्ख कठायतले त्यस सडकलाई आफूहरुले उत्तम विकल्प सम्झेको भए पनि पुलमा क्षति भएकाले त्यहाँ उपयुक्त नभएकाले जालेबगरमै सडक खुलाउने प्रयास गरिएको बताउनुभयो ।