बझाङमा भालुको आक्रमणबाट एक जना गम्भीर घाइते, सडक अवरुद्ध हुँदा धनगढी रेफर गर्न सकिएन

बझाङ : भालुको आक्रमणबाट बझाङका एक जना गम्भीर घाइते भएका छन् । घाइते हुनेमा जयपृथ्वी नगरपालिका ५ तीतानीका ७३ वर्षीय वृद्ध पदमराज जोशी रहेका छन ।

जोशीलाई असोज २९ गते बिहान ४ बजे घरबाहिर सौच गर्न गएका बेला भालुले आक्रमण गरेको हो । २९ गते बिहान ४ बजे उहाँको टाउको, अनुहार र शरिरमा आक्रमण गरि गम्भीर घाइते बनाएकोमा ३१ गते मात्रै आफन्तले थाहा पाएका थिए । डिलबगरको माथीको लेकमा रहेको खर्कमा गोठालोमा रहेका जोशी घर नफर्केपछि मात्रै आफन्तले सोधीखोजी सुरु गरि थाहा पाएका थिए ।

थाहा पाए लगत्तैे उपचारका लागी जिल्ला अस्पताल बझाङ ल्याइएका जोशीको जिल्ला अस्पतालमा उपचार हुन नसकेपछि आज उहाँलाई धनगढी रेफर गरिएको थियो । तर केदारस्युँ १ नारुगौडा खोलामा जयपृथ्वी राजमार्ग अवरुद्ध हुँदा घाइते जोशीलाई पुनः जिल्ला अस्पताल फर्काइएको जिल्ला प्रहरी कार्यालय बझाङले जनाएको छ ।