यातायात व्यवसायीको विरोधपछि बझाङमा फेरि बढ्यो भाडा दर

बझाङ : बझाङमा स्थानीय स्तरमा चल्ने सवारी साधनहरूको फेरि भाडा बढेको छ । यातायात व्यवसायीहरूले भाडा कम भएको गुनासो गरेपछि जिल्ला समन्वय समितिका संयोजक खडग बहादुर खडकाको अध्यक्षतामा बसेको सर्वपक्षिय बैठकले भाडा वृद्धि गरेको हो । 

बैठकले पक्की सडकमा प्रतिकिलो मिटर ७ रुपैयाँ २५ पैसा र कच्ची तथा ग्रामीण सडकहरूमा प्रति किलोमिटर १२ रुपैयाँ निर्धारण गरिएको हो । प्रमुख जिल्ला अधिकारी मोहन अधिकारीले ३ दिन भित्र सबै यातायातका साधनहरूमा अनिवार्य भाडाको लिस्ट यात्रुहरूले देख्ने गरी टाँस्नुपर्ने यदि नटाँसेको खण्डमा कानुन अनुसार कार्वाही गरिने बताउनुभयो ।

साथै बैठकबाट मनसुन सकिने बित्तिकै स्थानीय तहहरूले अनिवार्य सडक सफाइ गर्ने निर्णय समेत गरिएको छ । यस अगाडीको बैठकमा जयपृथ्बी राजमार्गमा ६ रुपैयाँ २५ पैसा र कच्ची सडकमा १० रुपैयाँ निर्धारण गरेको भए पनि यातायात व्यवसायीहरूले विरोध गरेपछि भाडा वृद्धि भएको हो । बैठकमा गाउँ तथा नगरपालिका प्रमुख, सुरक्षा निकाय प्रमुख, पत्रकार र यातायात व्यवसायी लगायत सरोकाबाला ब्यक्तीहरुको उपस्थिति रहेको थियो ।