छविसपाथिभेरामा गाउँपालिका स्तरिय स्वास्थ्य कार्यक्रमको समिक्षा तथा योजना तर्जुमा गोष्ठी सुरु

बझाङ : छविसपाथिभेरा गाउँपालिका स्तरिय स्वास्थ्य कार्यक्रमको समिक्षा तथा योजना तर्जुमा गोष्ठी सुरु भएको छ । आर्थिक वर्ष २०७७/०७८ स्वास्थ्य कार्यक्रमको समिक्षा तथा आर्थिक वर्ष २०७८/०७९ को योजना तर्जुमा गोष्ठी सुरु भएको हो ।

गाउँपालिका अध्यक्ष अक्कल धामीको अध्यक्षता र स्वास्थ्य कार्यालय बझाङ प्रमुख भानुभक्त जोशीको उपस्थितिमा स्वास्थ्य सम्बन्धि कार्यक्रमहरुको प्रगति र सूचकहरुमा २ दिनसम्म समिक्षा हुने र यो आर्थिक वर्षका कार्यक्रमको बारेमा छलफल हुनेछ । 

कार्यक्रममा बोल्दै स्वास्थ्य कार्यालय प्रमुख भानुभक्त जोशीले हाल विध्यमान् जनस्वास्थ्य समस्याहरुलाई मध्यनजर गर्दै स्वास्थ्य सम्बन्धी गतिविधि बढाउन पालिकामा उल्लेख्य बजेट ब्यवस्थापन हुनुपर्ने र स्वास्थ्य सस्थाबाट पनि स्वास्थ्य गतिविधिहरुको अभिलेख तथा प्रतिवेदन नियमित तथा शतप्रतिशत हुनुपर्ने बताउनुभयो । 

साथै उहाँले रेकर्डिङ्, रिपोर्टिङ र कार्यक्रम सञ्चालन गर्दा स्वास्थ्य कार्यालय बझाङले प्राविधिक सहजीकरण गर्ने पनि बताउनुभयो । यस्तै कार्यक्रममा बोल्ने क्रममा गाउँपालिका अध्यक्ष अक्कल धामीले नागरिकको स्वास्थ्यलाई पालिकाले उच्च प्राथमिकतामा राखेको बताउनुभयो। उहाँले पालिका अन्तर्गतका स्वास्थ्य संस्थालाई सूचना तथा प्रविधि मैत्री बनाइ सकिएको र अबबाट स्वास्थ्य सम्बन्धि गतिविधिहरुको रिपोर्टिङ तथा रेकर्डिङ सम्बन्धित स्वास्थ्य संस्थाबाटै गर्न र गुणस्तरिय स्वास्थ्य सेवा प्रदान गर्न संवेदनशिल हुन स्वास्थ्य संस्था प्रमुखहरुलाई निर्देशन दिनुभयो ।

यसैबीच कार्यक्रम सञ्चालनका क्रममा स्वास्थ्य कार्यालय प्रमुख जोशीले पालिकालाई कोभिड १९ बिरुद्धको खोप तथा अन्य स्वास्थ्य सामग्री हस्तान्तरण गर्नुभएको थियो।