बझाङमा जंगली च्याउ खाँदा तीन जना बिरामी, दुई जनाको अवस्था गम्भीर

बझाङमा जङ्गली विशालु च्याउ खाँदा एकै घरका तीन जना बिरामी परेका छन् । बिरामी पर्नेमा दुर्गाथली गाउँपालिका वडा नम्बर ५ का ४० वर्षिय तिलक पुजारा उनका छोराहरु १२ वर्षिय दर्शन पुजारा र ५ वर्षिय शुभम् पुजारा रहेका छन् ।

उनीहरु शुक्रबार दिउँसो १२ बजे विशालु च्याउ खाएर बेहोस् भएको र तिलककी श्रीमतिले तत्काल जिल्ला अस्पताल बझाङ ल्याएको जिल्ला प्रहरी कार्यालय बझाङका सूचना अधिकारी तथा  प्रहरी निरीक्षक किशोर जोशीले बताए ।

तिलक पुजारा र उनका कान्छा छोरा शुभमको जिल्ला अस्पतालमा उपचार हुन नसकेपछि डडेल्धुरा रेफर गरिएको र उनीहरु दुबैको अवस्था गम्भीर रहेको सूचना अधिकारी जोशीले बताए ।  तिलकका जेठो छोरा दर्शन पुजारा भने सामान्य उपचार पश्चात जिल्ला अस्पताल बझाङबाट डिस्चार्ज भएको उनको भनाई छ ।