कैलाशमा सञ्चालन भएको शिविरमा १ सय ९ जनाले सेवा लिए, ४८ जनाको खकारको नमुना संकलन

जयपृथ्वी नगरपालिका स्वास्थ्य शाखाको आयोजनामा आज जयपृथ्वी नगरपालिकामा वडा नम्बर १ मा क्षयरोगका बिरामीहरुको खोजपड्ताल तथा बृहत स्वास्थ्य शिविर सञ्चालन भएको छ ।

जयपृथ्वी नगरपालिकालाई क्षयरोग मुक्त पालिका बनाउने अभियान अन्तर्गत आज जयपृथ्वी नगरपालिकामा वडा नम्बर १ मा रहेको कैलाश स्वास्थ्य चौकीमा क्षयरोगका बिरामीहरुको खोजपड्ताल तथा बृहत स्वास्थ्य शिविर सञ्चालन भएका हो ।

शिविरमा ६९ जना महिला र ४० जना पुरुष गरि १ सय ९ जना सेवाग्राहीले स्वास्थ्य चेकजाँच गरि सेवा लिएको जयपृथ्वी नगरपालिकाको स्वास्थ्य शाखाका जनस्वास्थ्य निरिक्षक रामचन्द्र जोशीले बताउनुभयो । साथै उक्त शिविरमा ४८ जनाको क्षयरोग परीक्षणका लागि खकार नमुना संकलन समेत गरिएको जनस्वास्थ्य निरिक्षक जोशीको भनाई छ । यसअघि जयपृथ्वी नगरपालिका ६ र ७ मा शिविर सञ्चालन भएको थियो ।