खप्तडछान्ना गाउँपालिका : एउटै दरबन्दीमा दुईवटा शिक्षक राखेर अनियमितता

खप्तडछान्ना गाउँपालिकाले एउटै दरबन्दीमा दुईवटा शिक्षकलाई तलबभत्ता खुवाएर अनियमितता गरेको पाइएको छ । पालिकाले आर्थिक वर्ष २०७९/०८० मा महेश्वरी मावि गडरायका शिक्षक खडकराज जोशीको दरबन्दीमा निर्मला कुमारी जोशीलाई पुन: नियुक्त गरि अनियमितता गरेको पाइएको  हो ।

महालेखा परिक्षक प्रतिवेदन २०७९/०८० को प्रतिवेदन अनुसार महेश्वरी मावि गडरायका शिक्षक खडकराज जोशीले नेपाल सरकारको संघिय शशर्त अनुदानबाट तलब भत्ता खाँदै आएको र त्यही दरबन्दीमा निर्मला कुमारी जोशीलाई पुन: नियुक्त गरि ४ लाख ३७ हजार ७२७ रुपैयाँ अनियमितता गरिएको जनाइएको छ ।

शिक्षकको उपस्थिति हुँदाहुँदै पनि थप शिक्षक राखेर गाउँपालिकाले ४ लाख ३७ हजार ७२७ रुपैयाँ अनियमितता गरेको प्रतिबेदनमा उल्लेख छ । यस विषयमा गाउँपालिका अध्यक्ष उत्तम रोकायाले भने त्यो समयमा गाउँपालिमा विद्यालय निरिक्षक नहुँदा शिक्षक खडकराज जोशीलाई गाउँपालिका कार्यालयमा तानिएको हुँदा यसो देखिएको बताउनुभयो । उहाँले अहिले दोहोरो तलब दिन बन्द गरेको र शिक्षक जोशीले अब चाँडै राजिनामा दिने बताउनुभयो ।

यस्तै महालेखाले गाउँपालिकालाई आन्तरिक आयको विश्लेषण नगरि बित्तिय समानिकरण अनुदानबाट १३ जना शिक्षक नियुक्त गरि बढी खर्चभार गरेको भन्दै खर्च नियन्त्रणका लागि पनि सम्झाएको छ ।