केदारस्युँको देउरा र थलाराको रेगम जोड्ने झोलुङ्गे पुल समयमै नबन्ने ठेकेदारको संकेत 

लामो समयदेखि पुल अभावमा वारपार गर्न सेती नदीमा जोखिम मोलिरहेका थलारा, डोटी र केदारस्युँका बासिन्दाका लागि देउरास्थित सेती नदीमा यस बर्खायाममा पनि झोलुङ्गे पुल नबन्ने संकेत देखिएको छ । पुल निर्माणको काम सुरु गरेको देवभुमि कन्ट्रक्सन डडेल्धुराले सिभिलको काम सकेर अब लट्ठा लगायतका काम गर्न बाँकी नै रहँदा सरकारले पर्याप्त बजेट नदिदा असारभित्रै काम नसकिने संकेत गरेको छ । देवभूमी कन्ट्रक्सन डडेल्धुराका सञ्चालक तथा ठेकेदार डम्बरदत्त भट्टले सिभिलको काम सकेर केही समय सिमेन्ट क्युरिङ हुन दिने हुँदा तत्काल काम रोकिएको र बाँकी काम गर्न आफूहरुसँग बजेट नभएको बताउनुभयो ।  

उहाँले आफूले बिल पेस गरेकाले सरकारले समयमै भुक्तानी दिए असार मसान्तभित्रै सकिने नदिए ढिलो हुने बताउनुभयो । केदारस्युँ १ देउरा र थलारा १ रेगमलाई जोड्ने १७२ मिटर लामो यो झोलुङ्गे पुलको भदौसम्म निर्माण सम्पन्न गर्न समयसिमा दिइएको छ । लट्ठा लगायतका सामानहरु कम्पनीमा बनाउन अर्डर दिएकाले भुक्तानी भए समयमै पुल निर्माण हुने ठेकेदार भट्ट बताउनुहुन्छ। 

दुई पटक विधिवत रुपमा शिलान्यास गरिएको उक्त झोलुङ्गे पुल नबन्दा थलारा, डोटी र केदारस्युँका बासिन्दाकालाई आवातजावत गर्न समस्या हुने गरेको छ । २०७८ साल कार्तिक २ गते राति आएको बेमौसमी वर्षासँगैको सेती नदीको बाढीले देउरामा रहेको पुल बगाएको थियो । त्यसपछि केदारस्युँ गाउँपालिको देउरा र थलारा गाउँपालिका १ मा आवतजावत ठप्प भएको थियो ।  यस पुल निर्माण गर्नका लागि २०७९ फागुन २२ गते लोकसेवा आयोगका अध्यक्ष माधव रेग्मी, पूर्वाधार विकास प्रमुख इन्जिनियर महेश्वर घिमिरे लगायतको उपस्थितिमा पुलको शिलान्यास गरिएको थियो भने २०८० चैत्र २ गते केदारस्युँ गाउँपालिका अध्यक्ष गणेशबहादुर बोहरा र थलारा गाउँपालिका अध्यक्ष प्रकाश बहादुर रोकाया लगायतका जनप्रतिनिधिले शिलान्यास गर्नुभएको थियो । 

दुई दुई पटक शिलान्यास गरिएको यो झोलुङ्गे पुल बन्ने समय टाढिदै गर्दा सबै निकाय मौन रहेको थलारा १ का गौरीराज जोशीले बताउनुभयो । उहाँका अनुसार असारसम्म पुल नबने यहाँका बासिन्दा फेरि सेती नदी वारपार गर्न असहज हुने देखिएको छ । अहिले सेती नदी वारपार गर्न अस्थायी काठेपुल बनाइएको छ ।