बझाङ घर भएका दुई  प्रहरी दुई महिना देखि कार्यालयको सम्पर्क बाहिर 

प्रहरी प्रधान कार्यालयले एक महिना भन्दा बढी समय देखि गैर हाजिर रहेका प्रहरीलाई सात दिनभित्र सम्पर्कमा आउन निर्देशन दिएको छ । आफूखुसी हाजिर हुन छोडेका प्रहरीको खोजतलास गर्दा पनि सम्पर्कमा नआए पछि सात दिनभित्र स्पष्टीकरण सहित सम्पर्कमा आउन निर्देशन दिएको छ ।

यसरी विना जानकारी सम्पर्क विहिन हुनेमा दुइ जना बझाङ घर भएका प्रहरी पनि रहेको पाइएको छ । प्रहरी प्रधान कार्यालयले जारी गरेको सुचना अनुसार बझाङको दुर्गाथली गाउँपालिका–७ का विशाल बहादुर विक र थलारा गाउँपालिका–९ का उमेश थापा सम्पर्क बिहिन भएका छन् ।

कार्यालयका अनुसार काठमाडौ उपत्यका ट्राफिक प्रहरी कार्यालय ओआरटीमा दरबन्दी भई राष्ट्रिय प्रहरी प्रशिक्षण प्रतिष्ठानमा कार्यरत विशाल वि.क गत मंसिर २७ गते देखि र प्रहरी चौकी डोलेश्वर सिपाडोल भक्तपुरमा दरबन्दी भई काठमाडौ उपत्यका प्रहरी कार्यालय रानीपोखरीमा कार्यरत उमेश थापा मंसिर १० गते देखि गैर हाजिर रहेको जनाईएको छ । सात दिनभित्र पनि सम्पर्कमा नआए नियमानुसार सेवाबाट हटाइने प्रहरी प्रधान कार्यालयले जारी गरेको सुचनामा उल्लेख गरिएको छ ।