खप्तडछान्ना गाउँपालिकाद्धारा बामिलि टोलमा सोलार सेट वितरण

बझाङ : खप्तडछान्ना गाउँपालिका वडा नम्बर ३ बामिलि टोलमा सोलार सेट वितरण गरिएको छ । विद्युतको पहुँचबाट टाढा रहेको उक्त टोलमा खप्तडछान्ना गाउँपालिकाले आज बुधबार २३ थान सोलार सेट वितरण गरेको हो ।

पालिकाको पूर्वनिर्धारीत “बामिलि बस्ति सोलार वितरण कार्यक्रम” अन्र्तगत आज बामिलि टोलमा २१ परिवार र खप्तड सूचना केन्द्र लोखडाका २ परिवारलाई सोलार सेट वितरण गरिएको खप्तडछान्ना गाउँपालिकाका सूचना अधिकारी ऐन बहादुर रोकायाले जानकारी दिनुभयो ।

सोलार सेट वितरण कार्यक्रममा बोल्दै गाउँपालिका उपाध्यक्ष विष्णु थापाले अध्यारोमा बसेका टोलबासिलाई उज्यालोको अनुभूति गराउन पाउँदा खुसि लागेको बताउनुभयो । उहाँले स्थानियलाई सोलार लिएर राम्रोसँग प्रयोग गर्न पनि सुझाव दिनुभयो । बत्ती नहुँदा झरो बालेर बालबालिका पठनपाठन गर्न बाध्य रहेकोमा अब सोलार बत्तिले उनीहरूको पठनपाठनमा सहजीकरण गर्ने स्थानियले बताएका छन् ।

सोलार सेट वितरण कार्यक्रममा खप्तडछान्ना गाउँपालिका उपाध्यक्ष विष्णु थापा, वडा नं ३ अध्यक्ष गौरी अधिकारी रावल, गाउँपालिकाका सूचना अधिकारी ऐन बहादुर रोकाया र स्थानियहरुको सहभागिता रहेको थियो । बर्षौदेखि अँध्यारोमा बस्दै आएका स्थानियहरु सोलार सेट पाएपछि खुशि भएका छन् ।