वडाध्यक्ष अधिकारीको पहलमा मानसिक सन्तुलन गुमाएका व्यक्तिलाई नागरिकता प्रदान

बझाङ : बझाङमा एक मानसिक समस्या भएका व्यक्तिले वडाध्यक्षको पहलमा नागरिकता प्राप्त गर्नुभएको छ । जिल्लाको खप्तडछान्ना गाउँपालिका वडा नम्बर ३ घर भएका २४ वर्षिय किरन रावलले वडाध्यक्ष गौरी अधिकारी रावलको पहलमा लामो समयपछि नागरीकता प्राप्त गर्नुभएको हो ।

घरायसी समस्याका कारणले विगत एक वर्षदेखि मानसिक सन्तुलन गुमाएका किरण उचित हेरचाहको अभावका कारणले घरमा साहारा विहिन हुनुहुन्थ्यो । उहाँलाई केही दिनदेखि स्वास्थ्यमा समेत समस्या देखिएपछि वडाध्यक्ष गौरी अधिकारी रावलले आज जिल्ला अस्पताल सिमखेतमा ल्याएर उपचार थाल्नुभएको छ ।

उपचारको लागि सदरमुकाम पुर्याएको अवसरमा उहाँलाई नागरिकता समेत दिइएको छ । सहायक प्रमुख जिल्ला अधिकारी सत्य कुमारी जोशीले जिल्ला अस्पतालमै गएर नागरिकता प्रदान गरेको बताउनुभयो । जिल्ला प्रशासन कार्यालय आएर नागरिकता बनाउन नसक्नेहरुको लागि सम्बन्धित ठाउँमै गएर नागरिकता वितरण गर्ने कार्य समयानुकूल जारी राख्ने सहायक प्रमुख जिल्ला अधिकारी जोशीले बताउनुभयो ।