बझाङमा एक पसल तोडफोड गरेको आरोपमा १४ वर्षिय बालक पक्राउ 

बझाङमा पसल तोडफोड गरेको आरोपमा एक बालक पक्राउ परेका छन् । जिल्ला सदरमुकाम चैनपुरको चौराहा नजिकै रहेको एसपलस मोबाइल ग्यालरीमा चोरी गरेको आरोपमा एक बालक पक्राउ परेका हुन् ।

पक्राउ पर्नेमा सुर्मा गाउँपालिका वडा नम्बर २ का १४ वर्षीय अजय बोहरा रहेको जिल्ला प्रहरी कार्यालय बझाङले जनाएको छ । हिजो शुक्रबार राती साढे ११ बजेको समयमा बोहोरा मोबाइल ग्यालरी भित्र पसेर सामान चोरी गर्दै गरेको अवस्थामा स्थानियले देखेर प्रहरीलाई खबर गरेका थिए ।

खबर पाउनासाथ बझाङ प्रहरी प्रमुख एवं डिएसपि भरत बहादुर शाह सहितको टोली खटिएर उनलाई नियन्त्रणमा लिइएको बताइएको छ । चोरी गर्ने उद्येश्य सहित पसलको ताला फोडेर भित्र गएका बालकले प्रहरी र स्थानिय आएपछि सामान चोर्न भने नपाएको तर केहि मोबाइल, ल्याप्टप लगाएतका इलेक्ट्रोनिक सामाग्रीमा क्षती पुगेको पसल सञ्चालक शिवराज उपाध्यायले बताउनुभयो ।

घटनाको विषयमा थप अनुसन्धान भइरहेको र उनलाई कानुन अनुसार कार्बाही गरिने बझाङ प्रहरी प्रमुख तथा डिएसपी भरत शाहले बताउनुभयो । ति बालकले गत कार्तिकमा सुर्मा गाउँपालिका–३ धनीधारामा रहेको एक आधारभुत स्वास्थ्य केन्द्रमा समेत तोडफोड गरेर स्वास्थ्य सामाग्री चोरी गरेका थिए ।