विश्वकप एसिया छनोट : फाइनलमा आज नेपाल र ‌ओमान आमनेसामने हुँदै

आईसीसी टी–ट्वेन्टी विश्वकप एसिया क्षेत्र छनोटको फाइनलमा आज नेपालले ओमानसँग खेल्दैछ । टीयु क्रिकेट मैदान, कीर्तिपुरमा खेल बिहान ११ बजे सुरु हुनेछ ।

नेपालले सेमिफाइनलमा यूएईलाई ८ विकेट र ओमानले बहराइनलाई १० विकेटले हराउँदै फाइनलमा स्थान बनाएका हुन् । फाइनल पुगेसँगै दुवै टोलीले विश्वकपमा स्थान सुरक्षित गरेका छन् ।

समूह चरणको खेलमा ओमानले नेपाललाई पाँच रनले पराजित गरेको थियो । नेपाल आज सोही हारको बदला लिने योजनामा छ । घरेलु टोलीलाई समर्थकको साथसमेत हुनेछ । साथै टीयूमा नेपाल लगातार दोस्रो पटक उपाधि जित्न चाहन्छ । नेपालले पछिल्लो पटक गत वैशाखमा एसीसी प्रिमियर कपको उपाधि जित्दै एसिया कपमा स्थान बनाएको थियो ।

नेपालका लागि कुशल भुर्तेल, कुशल मल्ल र कप्तान रोहित पौडेलको ब्याटिङ प्रदर्शन महत्वपूर्ण हुनेछ । यस्तै आसिफ शेखले इनिङ होल्ड गर्नेछन् । दीपेन्द्र सिंह ऐरीलाई आज आराम दिइन सक्छ । सन्दीप लामिछानेले आज ४ विकेट लिए उनी टी–२० आईमा सबैभन्दा छिटो १ सय विकेट लिने बलरको कीर्तिमान बनाउने छन् । सोमपाल कामी र करण केसीको बलिङ नेपालका लागि महत्वपूर्ण हुनेछ ।

अकिब इल्यास र जिशान मकसुद ओमानका प्रमुख अलराउन्डर हुन् । बिलाल खानको बलिङ प्रदर्शन उसका लागि महत्वपूर्ण हुनेछ ।

पछिल्ला पाँच टी-२० खेलमा नेपाल तीन र ओमान दुई खेलमा विजयी भएका छन् । नेपाल र ओमानबीचको खेल रोमाञ्चक हुने अनुमान गरिएको छ ।