सुर्मादेवी मेला : पुरुष तर्फ भोली छबिस र थलारा, महिला तर्फ छबिस र बित्थड प्रथम स्थानका लागि भिड्ने

बझाङ : सुर्मादेवी मेलाको अवसरमा नेपाल खेलकुद महासंघ जिल्ला कमिटी बझाङले आयोजनामा गरेको महिला पुरुष भलिबल प्रतियोगितामा आज पनि क्वाटर फाइनल र सेमि फाइनल चरणका ७ खेल सम्पन्न भएका छन् । आज एक महिला र ६ ओटा पुरुष गरि ७ खेल भएका हुन् । पूरुष तर्फ आज भएको पहिलो खेलमा पहिलो जयपृथ्वी क्याम्पस र थलारा गाउँपालिकाबीच भिडन्त भएको थियो । 

जसमा थलाराले जित हात पारेको थियो भने जयपृथ्वी नगरपालिका र वित्थडचिर गाउँपालिकाबीच भएको खेलमा जयपृथ्वी नगरपालिकाले जीत हात पारेको थियो । त्यसपछि बिक्युब युथ ब्लब छबिस र थलारा गाउँपालिकाबीच भएको सेमी फाइनल खेलमा थलारा गाउँपालिकाले जीत हात पार्दै फाइनल प्रवेश गरेको छ । यस्तै छबिसपाथिभेरा गाउँपालिका र जयपृथ्वी नगरपालिकाबीच भएको सेमी फाइनल खेलमा छबिसपाथिभेराले जीत हात पार्दै फाइनल प्रवेश गरेको छ । 

भोली पुरुष तर्फ बिक्युब युथ ब्लब छबिस र जयपृथ्वी नगरपालिका तेस्रो स्‍थानका लागि भिड्ने छन् भने छबिसपाथिभेरा गाउँपालिका र थलारा गाउँपालिका प्रथम स्थानका लागि भिड्नेछन् ।  यता महिला तर्फ आज एउटा मात्रै खेल भएको थियो । तेस्रो स्थानका लागि भएको आजको खेलमा जयपृथ्वी नगरपालिका र मष्टा गाउँपालिकाबीच भिडन्त भएको थियो ।

निकै रोचक भएको यस खेलमा पहिलो सेट मष्टाले हात पारेको थियो भने दोस्रो जयपृथ्वी हात पारेको थियो । फाइनल सेटको अन्तिममा निकै अग्रता बनाएको मष्टा गाउँपालिकालाई जिल्याउँदै जयपृथ्वी नगरपालिकाले तेस्रो स्थान सुरक्षित गरेको छ । भोली महिला तर्फ प्रथमा स्थानका लागि छबिसपाथिभेरा गाउँपालिका र बित्थडचिर गाउँपालिका भिड्ने भएका छन् ।