बझाङमा दरबन्दी अनुसार प्रहरी नहुँदा सुरक्षा चुनौती, गाउँ गाउँमा प्रहरी चौकीको माग

बझाङमा दरबन्दी अनुसार प्रहरी नहुँदा सुरक्षा चुनौती थपिदै गएको छ । बझाङमा हाल कार्यालय सहयोगी र जनपथ प्रहरी र १० जना ट्राफिक प्रहरी गरि जम्मा ३ सय ८३ जनाको दबरन्दी भए पनि ७६ जना जनपथ र एक जना ट्राफिक प्रहरी लामो समयदेखि अनुपस्थित रहेका छन् । 

जिल्ला प्रहरी कार्यालय बझाङ अन्तर्गत ३० वटा युनिट रहेको बझाङमा हाल ३ सय १२ जना प्रहरी सुरक्षार्थ खटिनुपर्नेमा ७६ जना दुर्गम जिल्ला भएकै कारण काज मिलाएर बझाङ बाहिर बस्ने गरेको जिल्ला प्रहरी कार्यालय बझाङले जनाएको छ । ७६ जना मात्रै अनुपस्थित हुँदा सुरक्षा चुनौती बढेको डिएसपी भरतबहादुर शाहले बताउनुभयो ।

उहाँका अनुसार ७६ जना उपस्थित भएको भए अहिले असुरक्षित भएका ठाउँमा खटाउन सकिने र सुरक्षा अवस्था राम्रो हुने थियो । डिएसपी शाहले ७६ जना अनुपस्थितमध्ये अब जिल्लामा दुई तीन जनाभन्दा बढी हाजिर नहुने सम्भावना नरहेको समेत बताउनुभयो । जिल्लाभर हिंसात्मक घटना बृद्धि भइरहेका बेला आम जनता र स्थानीय तहले गाउँ गाउँमा प्रहरीको माग गरिरहेको तर जिल्लामा आवश्यक सुरक्षाकर्मी नहुँदा समस्या भएको डिएसपी शाहको भनाई छ ।

अहिले ठानाकोटमा ९९ जना प्रहरी छन् भने बाँकी जिल्ला ३० वटा प्रहरी युनिटमा खटिएका छन् । ट्राफिक प्रहरी पनि १० जनाको दरबन्दी भए पनि ९ जना मात्रै रहेको र ४ जना सिमखेत २ जना झोता, ३ जना बाग्थला अस्थाई प्रहरी पोष्टमा रहेको जिल्ला प्रहरी कार्यालयका सूचना अधिकारी दिपेश चौधरीले बताउनुभयो ।

अहिले छबिसपाथिभेरा ७, बुंगलका केही वडा, केदारस्युँको भामचौर, काँडाचौर लगायतका ठाउँमा प्रहरी युनिट स्थापना गरिदिन माग भइरहेको छ ।