विगत ७ वर्षदेखि अलपत्र अवस्थामा रहेको एक सरकारी भवन

केदारस्युँ गाउँपालिकामा एक सरकारी भवन विगत ७ वर्षदेखि अलपत्र परेको छ । केदारस्युँ गाउँपालिका वडा नम्बर --९ झोता बजार र सुँडिखोलाको बीच भागमा रहेको भैरवनाथ इलाका वन कार्यालयको भवन अलपत्र परेको हो । २०७३ साल १ महिना ३० गते सम्झौता भइ २०७४ साल असार मसान्तमा सम्पन्न भएको उक्त इलाका वन कार्यालय र स्थानीय सरकारको वेवास्ताका कारण अलपत्र परेको हो ।

तत्कालिन् जिल्ला वन कार्यालयसँग भवन निर्माणका लागि भ्याटसहित ३१ लाख ४० हजार ४ सय ३६ रुपैँयाँमा ठेक्का सम्झौता गरेका थलारा -०३ कुचका गगनबहादुर सिंहले वि.सं. २०७३ असार ३० गतेसम्म अर्थात् २ महिनामा निर्माण सम्पन्न गर्नुपर्ने थियो तर दुई महिनामा नसकिने भएपछि एक वर्ष म्याद थप भएको थियो ।

म्याद थप अनुरुप ठेकेदार सिंहले २०७४ साल असार मसान्तसम्म भवन निर्माण सम्पन्न गरेका थिए । तर ठेकेदारले सिंहले प्लास्टर्ड गर्नु मात्रै बाँकी रहँदा पनि १८ लाख मात्रै रकम पाएको गुनासो गरे । भवन निर्माण सम्पन्न गरे पनि प्राविधिकले बिल नउठाउँदा रकम फ्रिज गएको उनको भनाई छ । उनका अनुसार तत्कालिन् जिल्ला वन कार्यालयले  अझैं ९ लाख जति रकम दिन बाँकी रहेको हुँदा उनले हस्तान्तरण नगरि बसेका थिए ।

झोतामा कार्यालय सञ्चालन गरि सेवा प्रवाह गर्दै इलाका वन कार्यालय नयाँ भवनमा सर्नुको सट्टा झन् सैन्सुमा गएर बसेको स्थानीय गोवीलाल बोहराले बताए । तत्कालिन् जिल्ला वन कार्यालय प्रमुख असोक कुमार श्रेष्ठले भवनको बाँकी रकम दिन आलटाल गर्दागर्दै रकम फ्रिज गएको हो । भवन ७ वर्षसम्म अलपत्र पर्दा पनि डिभिजन वन कार्यालय र स्थानीय तहले भवनबारे चाँसो नराखेको ठेकेदार सिंहको गुनासो छ ।

आफूले पाउन बाँकी रकमका लागि अदालत जाने पनि सिंहले बताएका छन् । भवनबारे केदारस्युँ गाउँपालिकाले पनि अनुपयुक्त ठाउँमा रहेको भन्दै लगानी गर्न अनिच्छा प्रकट गरेको छ । केदारस्युँ गाउँपालिका अध्यक्ष गणेश बोहराले उक्त भवन भीरको मुनी रहेको हुँदा जुनसुकै वेला पनि ढुंगा खस्न सक्ने हुँदा कसैले बस्न नरुचाएको र पालिकाले पनि लगानी गर्न नचाहेको बताउँछन् ।

केही वर्ष अगाडी सरिया बोकेर हिडिरहेको ट्र्याक्टर दुर्घटना हुन गइ एक जनाको त्यही भवनको आँगनमा मृत्यु भएपछि झन् कसैले भवनबारे चाँसो नराखेको स्थानीयको भनाई छ ।