नेपाललाई विश्वसामु चिनाउने ढाँटलाई हौसला स्वरुप बित्थडचिरले एक लाख दिने, वडाध्यक्षले पनि सहयोग गर्ने

• मनिस बोहरा / देउलेख

बित्थडचिर गाउँपालिकाले मिक्स मार्सल आर्ट्सका स्टार रविन्द्र ढाँटलाई हौसला स्वरुप एक लाख दिने भएको छ । ढाँटले थाइल्यान्डमा भएको खेलमा रुसका खेलाडीलाई पराजित गर्दै वन फ्राइडे फाइट्समा विजयी हासिल गरि नेपालको नाम विश्वसामु पुर्याउनुभएको थियो ।

भदौ २९ गते शुक्रबार भएको वन फ्राइडे फाइट्समा रविन्द्र ढाँटले रुसका तोरेप्च्ची डोंगाकलाई तेस्रो राउण्डमा टेक्निकल नकआउटमा हराउनुभएको थियो । बित्थडचिर स्थायी घर भइ व्यावसायिक फाइट करिअर बनाइरहेका रविन्द्रले रुसलाई हराएसँगै उहाँले छैटौं पटक बिजयी हाँसिल गर्नुभएको हो ।

उहाँको हौसलाका लागि अहिले बित्थडचिर गाउँपालिकासँगै वडाध्यक्ष र अन्य बित्थडबासीहरु पनि आर्थिक सहयोग गर्न थालेका छन् । हालसम्म बित्थडचिर गाउँपालिकाले एक लाख, बित्थडचिर गाउँपालिका वडा नम्बर ५ का वडा अध्यक्ष अनिल महरले रु. २५ हजार, वडा नम्बर ६ का वडाअध्यक्ष हरिश खड्काले रु २० हजार, वडा नम्बर ३ का वडा अध्यक्ष गणेश बोहोराले रु. २३ हजार आर्थिक सहयोग गर्ने जनाएका छन् ।

रविन्द्र घरको आर्थिक अवस्था कमजोर भएपछि जीविकोपार्जनकै सिलसिलमा भारत पुगेका थिए । नेपालमा एसएलसी दिएपछि भारतमै सामान्य जागिर गरेका उनले कराते खेल सिक्दै मिक्स मार्सल आर्ट्समा प्रवेश गरेका थिए । पछिल्लो केहि वर्षदेखि उनी नेपालको लक एन्ड रोल एमएमएमा दिविज पियाको व्यवस्थापनमा रहेर मार्सल आर्ट्समा पूर्ण रुपमा लागेका थिए । उनले भारतमा पनि केहि प्रतियोगिता जित्दै वन च्याम्पियनसिपको यात्रा तय गरेका हुन् ।