बझाङमा तीन जना मिलेर दुई जना नाबालिका जबरजस्ती करणी गरेको आरोप 

मष्टा गाउँपालिकामा तीनजना किशोरमाथि जबरजस्ती करणी आरोप लागेको छ । मष्टा गाउँपालिका वडा नम्बर १ रनाडा रुपदेउली टोलमा दुई जना नाबालिकालाई ललाईफकाइ गरेर तीन जना नाबालक किशोरले जबरजस्ती करणी गरेको आरोप लागेको हो । आरोपित तीनै जना यही भाद्र १४ गते राति घटनास्थलबाटै फरार रहेको प्रहरीले जनाएको छ । 

पिडित बालिकाहरु हाल जिल्ला प्रहरी कार्यालयको महिला सेलमा छन भने फरार आरोपितहरुको खोजी भइरहेको प्रहरीले जनाएको छ । यही भाद्र १४ गते साँझ ६ बजे कापी किन्न पसल हिडेकी नाबालिकालाई सरस्वति मावि हातामा बोलाई कक्षा कोठामा जबरजस्तीकरणी गरेको पिडित नाबालिकाका आफन्तले बताएका छन् । 

दुई नाबालिकालाई कक्षा कोठामा बन्धक बनाई जबरजस्ती करणी गरी फरार भएको उनीहरुको आरोप छ । राति ९ बजे बालिका चिच्याएपछि मात्रै पिडित आफन्तले थाहा पाएका थिए । 

एक पिडित बालिकाकी आमाले भनिन्,‘मेरी १२ वर्षीया छोरी हो । साँझ ६ बजे नजिकैको पसलमा कापी किन्न भान्जीसँग पसल गएकी हो । त्यहीँनेर स्कुलमा खेलिरहेका तीन जना पुरुषले मेरी छोरी र भान्जीलाई बोलाएर चाउचाउ बिस्कुट खुवाएछन् । राति ९ बजेसम्म घरमा नआएपछि म निकै आत्तिएकी थिएँ । नभन्दै ९ बजे मेरी छोरी चिच्याएको आवाज आयो । म हत्तपत्त दगुर्दै गाउँलेलाई गुहारेर स्कुलभित्र छिरें । स्कुलमा खोजी गर्यौं‍ तर भेटाएनौं । मकैबारी, कोदोबारी सबैतिर गाउँले मिलेर खोज्यौं तर तीनीहरुले दुबै जना बालिकालाई लगेर नजिकै आसीकारन्या जंगलमा भागेछन् । धेरैपछि छोरी र भान्जी भेटायौं । त्यति बेला दुबै जना होसमा थिएनन् । पछि छोरीलाई सोध्दा जबरजस्ती करणी भएको रहेछ । उनीहरुले कसैलाई नभन्नु भने मार्दिन्छु भनेर छोरी र भान्जीलाई डराएका रहेछन् ।’

अहिले पिडितका आफन्तहरुलाई उल्टै करणी गर्नेहरुका आफन्तहरुले धम्क्याउने गरेको र किशोरहरुलाई लुकाउनमा प्रहरीसमेत संलग्न रहेको पिडित पक्षको आरोप छ । प्रहरीले पनि फरार भएका आरोपितहरुलाई खोज्न तदारुकता नदेखाएको पिडित पक्ष बताउँछ ।

पिडित किशोरीकी आमाले भनिन्,‘हामीलाई त्यत्तिकै आरोप लगाउने खुकुरी हान्दिछौं भनेर उल्टै थर्काए । उनीहरुको धम्की बाबजुत पनि हामीले प्रहरीले निवेदन दियौं । मेरी १२ बर्षिय छोरीलाई बेहाल बनाइदियो । यतिका दिनसम्म पुलिसले पनि खोजीरहेका छौं मात्रै भन्छ । अहिलेसम्म तीनीहरुको बारेमा आफन्तसँग सोधपुछ गरेको छैन । यो देशमा न्याय पाइदैन कि क्या हो ?’

यता जिल्ला प्रहरी कार्यालय बझाङले भने आरोपितहरुको खोजी भइरहेको बताइरहेको छ । जिल्ला प्रहरी कार्यालय बझाङका सूचना अधिकारी दिपेश चौधरीले भने, ‘हामी अनुसन्धान प्रक्रियामै छौं । ती करणी आरेप लागेकाहरु पनि नाबालक हुन सक्छन् । अहिले नाम सार्वजनिक नगरौं । वडा प्रहरी कार्यालयले उनीहरुको व्यक्तिगत कुरा खोजीरहेको छ । यसबारै सबै कुरा पछि भनौंला ।’

नोट : प्रहरीले दुबैपक्ष नाबालक रहेको बताएपछि कसैको नाम र उमेर समावेश छैन ।