न्यूनतम सेवा मापदण्डमा जिल्ला अस्पताल बझाङ देशकै दोस्रो स्थानमा

बझाङ : न्यूनतम सेवा मापदण्डमा जिल्ला अस्पताल बझाङ देशकै दोस्रो स्थानमा पर्न सफल भएको छ । स्वास्थ्य तथा जनसंख्या मन्त्रालयको न्यूनतम सेवा मापदण्ड अनुगमन मूल्याङ्कन (एमएसएस)मा जिल्ला अस्पताल बझाङ देशकै दोस्रो स्थानमा पर्न सफल भएको हो ।

संघीय स्वास्थ्य मन्त्रालय र स्वास्थ्य निर्देशनालयद्वारारा प्रत्येक ६ महिनामा गरिने सो मूल्याङ्कनमा जिल्ला अस्पताल बझाङ देशभरमै न्यूनतम सेवा मापदण्डमा उत्कृष्ट अस्पतालको सूचीमा दोस्रो नम्बरमा पर्न सफल भएको हो । अस्पतालले भौतिक पूर्वाधारदेखि उच्च गुणस्तरका स्वास्थ्य उपकरणबाट सेवा दिदै देशभरमै दोस्रो उत्कृष्ट अस्पताल बन्न सफल भएको हो ।

संघीय स्वास्थ्य मन्त्रालयद्वारा उक्त मुल्यांकनमा बझाङ जिल्ला अस्पतालले ९३ प्रतिशत अंक ल्याएको अस्पतालका मेडिकल सुपरिटेन्डेन्ट तथा अस्पताल प्रमुख डा.नवराज जोशीले बताउनुभयो । यसअघि ८४ प्रतिशत मात्रै अंक ल्याएको अस्पतालले यो वर्ष ९३ प्रतिशत ल्याएर अग्र स्थानमा उक्लिएको डा. जोशीले बताउनुभयो ।

उहाँले अस्पतालमा कार्यरत कर्मचारी, स्वास्थ्यकर्मी र अस्पताल व्यवस्थापन समितिका पदाधिकारी लगाएत सवैले मिलेर काम गर्दा देशभर दोस्रो उत्कृष्ट अस्पतालको रुपमा परिचय बनाउन आफुहरु सफल भएको बताउदै अगामी दिनमा पनि अस्पतालको सेवालाई गुणस्तरीय बनाउनकालागी सबैको सुझाव र सल्लाहलाई समेटेर अगाडी बढ्ने समेत बताउनुभयो ।

नयाँ भवनबाट सेवा दिइरहेको जिल्ला अस्पतालमा अहिले विशेषज्ञसहित चिकित्सकहरुले उपचारात्मक सेवा नियमित दिइरहनु भएको छ । प्रशासन व्यवस्थान, क्लिनिकल सर्भिस र हस्पिटल सपोर्ट सिस्टममलाई आधार मानेर गरिएको अनुगमनमा हेर्ने गरिएको छ । यस अघि जिल्ला अस्पताल बैतडी ९५ प्रतिशत अंक सहित देशकै उत्कृष्ट पहिलो नम्बरमा पर्न सफल भएको थियो ।