बझाङमा एम्बुलेन्सको ठक्करबाट मोटरसाइकल चालकको मृत्यु

बझाङमा एम्बुलेन्सले मोटरसाइकललाई टक्कर दिँदा एक जनाको ज्यान गएको छ । जिल्लाको बित्थडचिर गाउँपालिका वडा नं ६ चिसापानी मोडमा एम्बुलेन्सले सोही दिशा तर्फ आइरहेको मोटरसाइकललाई ठक्कर दिँदा स्थानीय २३ वर्षिय मोटरसाइकल चालक गोवीन्द्र महरको ज्यान गएको हो । 

देउलेखबाट सुनकुडा तर्फ आउँदै गरेको शु प प्र ०१००झ ३६१ नम्बरको एम्बुलेन्सले सोहि दिशा तर्फ आइरहेको से ५ च २०२४ नम्बरको मोटरसाइकललाई मंगलबार दिउँसो ३ बजेतिर ठक्कर दिएको जिल्ला प्रहरी कार्यालय बझाङका सूचना अधिकारी रमेश अवस्थिले जानकारी दिनुभयो । 

एम्बुलेन्सले ठक्कर दिएपछि गम्भिर घाइते भएका महरलाई उपचारको लागि धनगढी लिदै गर्दा बैतडीको खोड्पेमा मृत्यु भएको हो । उक्त एम्बुलेन्स देउलेख प्राथामिक स्वास्थ्य केन्द्रको रहेको प्रहरीले जनाएको छ । एम्बुलेन्स चालक स्थानीय ४५ वर्षीय हर्क ढाँटलाई प्रहरीले नियन्त्रणमा लिएको छ । अहिले मृतकका आफन्तहरुको विरोध प्रदर्शनका कारण जयपृथ्वी राजमार्ग बन्द भएको र सहमतिको प्रयास भइरहेको प्रहरीले बताएको छ ।