बझाङमा हिमपहिरोमा परेर बेपत्ता भएकि महिलाको शव भेटियो

बझाङ : बझाङमा हिमपहिरोमा परेर बेपत्ता भएकि महिलाको शव भेटिएको छ । यार्सागुम्बा संकलनको लागि पार्थिहिमाल गएको अवस्थामा हिम पहिरोमा परेर बेपत्ता भएकि सुर्मा गाउँपालिका १ देवडी घर भएकी ३३ वर्षीया झल्नादेवी बोहराको शव भेटिएको जिल्ला प्रहरी कार्यलय बझाङले जनाएको छ । 

छोेरासहित सुर्मा गाउँपालिकाको पार्थीहिमालको वनमा यार्सागुम्बा संकलन गर्न गएकी बोहरा  हिमालबाट घर फर्किने क्रममा वैशाख १९ गते मंगलबारदेखि हिउँ पहिरोमा परेर बेपत्ता भएकी थिइन् ।

बेपत्ता भएको दिनदेखि नै स्थानिय, नेपाल प्रहरी र शसस्त्र प्रहरीले निरन्तर खोजिकार्य गरेकोमा आज सोमबार बिहान मात्रै शव भेटिएको हो । 

बेपत्ता भएको ठाउँबाट करिब एक किलोमिटर तल पार्थीभिरमा आज शब भेटिएको सुर्मा गाउँपालिका वडा नं १ का वडा अध्यक्ष दिनेश बोहोराले जानकारी दिनुभयो । अध्यक्ष बोहोराका अनुसार मृतक महिलाले लगाएको सुुनको गहना समेत हराएको छ । अहिले मृतकको शवलाई घर ल्याउने काम भैरहेको छ ।