बझाङका एक शिक्षकको तनहुँमा करेन्ट लागेर मृत्यु

बझाङ : बझाङका एक शिक्षकको तनहुँमा करेन्ट लागेर मृत्यु भएको छ । बझाङको तलकोट गाउँपालिका–२ का २७ वर्षीय जीवन रोकायाको करेन्ट लागेर मृत्यु भएको हो ।

तनहुँ जिल्लाको घिरिङ गाउँपालिका–२ मा आइतबार दिउँसो करेन्ट लागेर रोकाया सँगै लमजुङको मध्यनेपाल नगरपालिका–७ का ५० वर्षीय तीर्थ घिमिरे घाइते भएका थिए । विद्यालय छुट्टि भएपछि घर जाने क्रममा ग १३ प ७०९ नम्बरको मोटरसाइलमा सवार दुवै जना सडक छेउमा लत्रिएको थ्रीफेजको लाइनको तार छुन गई करेन्ट लाग्दा घाइते भएको तनहुँ प्रहरीले जनाएको छ ।  

करेन्ट लागेर सख्त घाइते भएका दुवै शिक्षकलाई उपचारका लागि पोखरा पठाइएको थियो । रोकायाको उपचारको क्रममा पोखरामा मृत्यु भएको छ । अर्का घाइते शिक्षक घिमिरेको उपचार भैरहेको छ । रोकाया तनहुँ जिल्लाको पार्वती आधारभूत विद्यालयमा कार्यरत थिए ।