बझाङमा माध्यमिक शिक्षा परीक्षा एसइइको तयारी अन्तिम चरणमा

बझाङ : बझाङमा माध्यमिक शिक्षा परिक्षा एसइइको तयारी अन्तिम चरणमा पुगेको छ । यही चैत १७ गते शुक्रबारबाट हुने एसईई परीक्षाको तयारी जिल्लामा अन्तिम चरणमा पुगेको  हो । बझाङमा एसइइको  तयारी अन्तिम चरणमा पुगेको शिक्षा विकास तथा समन्वय इकाइका प्राविधिक सहायक जनक रोकायाले जानकारी दिनुभयो ।

परीक्षा केन्द्र निर्धाण  र केन्द्राध्यक्ष नियुक्ती यसअघि नै भइसकेको तथा मंगलबार अभिमुखिकरण तालिम दिइने पनि उहाँले बताउनुभयो । बझाङबाट यस वर्ष एसईई परीक्षामा २ हजार ३ सय ८ छात्र र २ हजार ९२ छात्रा गरि चार हजार ४ सय जना सहभागी हुँदै छन् ।

४ हजार ३९ नियमित, ग्रेड वृद्धि १९ र ३ सय ४२ जना प्राविधिक धारका परीक्षार्थीहरु गरि जम्मा चार हजार ४ सय जना परीक्षामा सहभागि हुने शिक्षा विकास तथा समन्वय इकाइका प्राविधिक सहायक रोकायाले बताउनुभयो ।  जिल्ला परीक्षा समन्वय समितिको बैठकले एसइइ परीक्षा सञ्चालनका लागि १८ ओटा केन्द्र तोकेको छ  ।

अन्य वर्ष ग्रेड वृद्धि र प्राविधिक धारका लागि अलग केन्द्र राखिने गरेको भए पनि यो वर्ष त्यो केन्द्र हटाइएको छ । यो वर्ष ग्रेड वृद्धि र प्राविधिकधारका परीक्षार्थीहरुले पनि सम्बन्धित विद्यालयको केन्द्र मार्फत् नै परीक्षा दिन पाउने भएका छन् ।