खप्तडछान्ना गाउँपालिकामा राष्ट्रपति रनिङ शिल्ड प्रतियोगिता सुरु

बझाङ : खप्तडछान्ना गाउँपालिकामा आजदेखि राष्ट्रपति रनिङ शिल्ड प्रतियोगिता सुरु भएको छ । शिक्षा,युवा तथा खेलकुद शाखा खप्तडछान्ना गाउँपालिकाको आयोजनामा आजदेखि लामातोला माविमा प्रतियोगिता सुरु भएको हो ।प्रतियोगिताको खप्तडछान्ना गाउँपालिका अध्ययक्ष उत्तम रोकायाले उद्घाटन गर्नुभएको छ ।

प्रतियोगिताको उद्घाटन गर्दै अध्यक्ष रोकायाले खप्तडछान्नाकोे समग्र विकासका लागि खेलकुदको महत्तपूर्ण भूमिका हुने बताउनुभयो ।उहाँले खप्तडछान्ना गाउँपालिका भित्र शैक्षिक गुणस्तर न्यून भएकाले त्यसको सुधारका लागि पनि सबैको पहल आवश्यक रहेको बताउनुभयो । खेलाडीहरुलाई अनुशासीत भएर खेल्न आग्रह गर्दै रेफ्रिहरुलाई हाम्रो भन्दा पनि राम्रो खेलाडीलाई प्रोत्साहन गर्न अध्यक्ष रोकायाले आग्रह गर्नुभयो ।

उहाँले गाउँपालिकास्तरीय राष्ट्रपति रनिङ शिल्ड प्रतियोगिताबाट विजयी भएर राष्ट्रिय स्तरमा पुग्ने खेलाडीलाई गाउँपालिका आवश्यक सहयोग गर्ने आश्वासन समेत व्यक्त गर्नुभयो लामातोला माविका विद्यालय व्यवस्थापन समिति अध्ययक्ष पदम थापाकोसभापतित्वमा भएको उद्घाटन कार्यक्रममा खप्तडछान्ना गाउँपालिकाका उपाध्यक्ष विष्णु कुमार थापा, निमित्त प्रमुख प्रशासकीय अधिकृत हरी प्रशाद सोती, सम्पुर्ण वडाका वडाध्यक्षहरु लगायत शिक्षक विद्यार्थी, खेलाडीको सहभागिता रहेको थियो ।

माघ २८ गतेसम्म संञ्चालन हुने प्रतियोगितामा ८ विद्यालयको सहभागिता रहेको खप्तड मावि कालुखेतीका शिक्षक गोरख रोकायाले जानकारी दिनुभयो । प्रतियोगितामा भलिबल,ज्याव्लिङ थ्रो,लङजम्प,हाइजम्प लगाएतका खेलहरु खेलाइने जनाइएको छ ।