छबिसपाथिभेरा गाउँपालिकामा सञ्चालित ३ दिने आँखा शिविर सम्पन्न 

बझाङ: बझाङको छबिस पाथिभेरा गाउँपालिकामा १९ गतेबाट सुरु भएको ३ दिने आँखा शिविर सम्पन्न भएको छ । आँखा शिविर बाट १ हजार ४ सय ६४ जना विद्यार्थीले आँखा चेकजाँच गराएका छन् । यहि मंसिर १९ गते देखि सुरु भएको आँखा शिविर आज सकिएको हो । पहिलो दिन सोमबार छबिस पाथिभेरा गाउँपालिका– ६ को बाठपाली माध्यमिक विद्यालयमा, भएको शिविरमा ५ सय ५२ जनाले आँखा चेकजाँच गराएका छन् ।

मंगलबार शान्ति माध्यमिक विद्यालय चौघानपाटामा भएको शिविरमा ४ सय ३२ जनाले र आज जनप्रीय माध्यमिक विद्यालय बगडगाउँमा भएको शिविरमा ४ सय ८० जनाले आँखा चेकजाँच गराएको छबिस पाथिभेरा गाउँपालिका प्रवक्ता तथा १ नम्बर वडाका वडाअध्यक्ष करनजंग बहादुर सिंहले जानकारी दिनुभयो ।

प्रवक्ता सिंहका अनुसार जम्मा १ हजार ४ सय ६४ जना विद्यार्थीले आँखा परिक्षण गरेका हुन् । चेकजाँच गराएका  मध्ये ३१ जनालाई चस्मा वितरण गरिएको हो । छबिस पाथिभेरा गाउँपालिकाको आँखा उपचार केन्द्र र गेटा आँखा अस्पताल संगको  सहकार्यमा आँखा शिविर संचालन गरिएको थियो ।