छबिसपाथिभेरा गाँउपालिका वडा नं १ का ७ वटा सामुदायिक विद्यालयलाई अभ्यास पुस्तिका वितरण

बझाङ: बझाङको छबिसपाथिभेरा गाउँपालिका– १ अन्तर्गतका ७ वटा सामुदायिक विद्यालयका २ सय जना विद्यार्थीलाई अभ्यास पुस्तिका वितरण गरिएको छ । वडा कार्यालयले आर्थिक वर्ष २०७८÷७९ को बजेट तथा कार्यक्रम अन्तर्गत ७ वटै सामुदायिक विद्यालयका विद्यार्थीलाई एक वर्षसम्मका लागि अभ्यास पुस्तिका वितरण गरेको हो । आज छबिस पाथिभेरा गाउँपालिका– १ का वडा अध्यक्ष करनजंगबहादुर सिंहको अध्यक्षता र सबै सामुदायिक विद्यालयका प्रधानाध्यापकको उपस्थितिमा पहिलो पटक कक्षा १ देखी ५ सम्मका बालबालिकालाई विद्यालयको पाठ्यपुस्तक जस्तै अभ्यास पुस्तिका वितरण गरिएको हो ।

विद्यार्थीले घरमै बसेर अभ्यास पुस्तिकामा लेखिसकेपछि शिक्षकलाई जाँच गर्नका लागि दिइने वडा कार्यालयले जनाएको छ । वडाको बजेट २ लाख ५० हजारको लगानीमा ५ हजार प्रति अभ्यास पुस्तिका छापिएको हो । आफ्नो वडाको विद्यार्थी बालबालिकाको उज्वल भविष्यको परिकल्पना स्वरुप अभ्यास पुस्तिका वितरण गरिएको अध्यक्ष सिंहले बताउनुभयो । उहाँले स्थानीय तहमा शैक्षिक व्यवस्थापनको सवालमा देखिएका केही समस्याहरुलाई पनि उजागर गरी आगामी दिनमा विद्यार्थीको सुन्दर भविस्य तय गर्नको लागि सकारात्मक प्रभाव पार्ने अपेक्षा गरिएको बताउनुभयो ।